Beısenbide Oral qalalyq ákimdiginiń májilis zalynda komersıalyq baǵyttaǵy nysandar qurylysy úshin jer telimderin jaldaý quqyǵyn satý boıynsha kezekti aýksıon ótti. Aýksıonǵa 10 jer telimi shyǵaryldy.
Oral qalalyq jer qatynastary bóliminiń basshysy Arman Bısembalıevtyń aıtýynsha, QR-nyń Jer kodeksiniń 48-babyna sáıkes komersıalyq baǵyttaǵy nysandar qurylysy úshin jer telimderin jaldaý quqyǵyn satý aýksıon arqyly júrgiziledi. Satyp alýshylar jer telimin úsh jyl ishinde maqsatty paıdalanýy kerek. Olaı bolmaǵan jaǵdaıda, QR Jer kodeksiniń 92-inshi jáne 94-baptaryna sáıkes jer telimi keri qaıtarylyp alynady. Jalǵa alý quqyǵynyń úsh jyldyq merzimi aıaqtalǵan soń kásipker kadastrlyq qunyn qosa tólep, jer telimin óz menshigine aýdara alady. Kezekti aýksıon ótkiziletini jóninde tıisti zańǵa sáıkes kúntizbelik 15 kún buryn, ıaǵnı 11 sáýirde BAQ-tarǵa habarlandyrý berildi. Aýksıonǵa qatysýǵa 32 adam 53 ótinish berdi. Saýda-sattyqqa shyǵarylǵan jer telimderi Oral qalasynda jáne qalaǵa irgeles Zashaǵan kentinde ornalasqan. Eń úlken jer teliminiń aýmaǵy 2 gektar, ózgeleri ár túrli aýmaqty quraıdy.
– Aýksıonǵa shyǵarylǵan 10 jer teliminiń 9-y ǵana ótti. Bir jer telimine bir adam ǵana ótinish bergendikten, ol jer telimi zań boıynsha aýksıonǵa shyǵarylmady. Toǵyz jer telimi jaldaý quqyǵymen satylyp, odan 28 mln. 232 myń teńge tústi. Zashaǵan kentindegi eń úlken jer telimi 4 mln. 200 myń teńgege ótti. Sondaı-aq osy aýdandaǵy akademık Q. Jumalıev atyndaǵy kóshedegi 0,15 gektar jer eń qymbat baǵaǵa ótti, ıaǵnı 5 mln. 50 teńgeni qurady, – dedi Arman Bısembalıev. Onyń aıtýynsha, ótken jyldan
beri úsh aýksıon, bir konkýrs ótkizilgeni belgili. Úsh aýksıonda 17 jer telimi jaldaý quqyǵymen satylyp, odan 72,3 mln. teńge tústi.
– Jer telimi jaldaý quqyǵymen satylatyn aýksıondardyń ótkizi-
lýine kóńilim tolady. Bári ashyq, kóz aldyńda. Árkim ózine qajetti jer telimin jaǵdaıyna qaraı satyp alady. Qurylysshy shaǵynaýdanyndaǵy jer telimi 65 myń teńgege usynyldy, men ony 3 mln. 645 myń teńgege aldym, – deıdi «Polıgrafservıs» JSHS-nyń ókili Dáýren Qaıyrov.
Mamyr aıynyń aıaǵyna qaraı taǵy bir aýksıon ótkizip, 15 jer telimi usynylady dep kútiledi.
